OROPERİŞİ GONÇELU
Holo seri divu, osinteşi yaniz bidi.. kodoptkiti.
heşo boçzker gza kale mendrapes
a biduşunam do gobindunu
izmocepez obintale
si gzirum, ma moczhker..
ğe mekinçuşinam dobikaça deyi
goyinduni aniden
hemindoaz deli bive
ham serepe düşmani domaven
holo mendarelepez a nena bognam
skani nena emzdums mendemiyonams na vabiçinam yerepeşa
ulun mulun nosi. si soore..
mohti do pupulepes çzâmi divi ey yari mohti.
Maçarale: Koyinişi Sedati
-------------------------------------------------------------------------------
İsa nenaz mu itkven Nazimi çkimi
İsa nenaz miz mu utkun
Çkun;
Xirxineri n3xenepete var moptit
Mitiş dobadona var goptit
Mitti mitiş getasule var bzonit
Hak bort’it.
İsa nenaz miz mu utkun
Çkun,
Dodgina do meşvena şeni
İxi do 3’k’ari bort’it
Çkun,
İxiti,
3’k’ariti
Mzuğati
Eçkinduşen doni kobort’it
Xepe di3xiri mpalu
K’ibirepe geç’k’aderi
K’uçxe t’ent’eli
Let’a
Lazona
Şilya do şilya 3’anaşen doni doxmeli.
Mzuğa
Noğa
Rak’ani
Mtelli çkuni.
Çkva cenneti
Çkva cennemi
Çkuni
Anadolu k’oçobaşi
Ar guri
Lazona hem gurişi
Doloxeni pukuri
Geink’olaz xark’iş
Nek’nape
Dalepe, cumalepe
Nek’na gelanderi
P’ot’e na var goin3’k’en steri.
Engalit do emsilit k’oçi k’oçişa cgina
Gecgina. Dodgina unon cuma dodgina
Ç’anda unon ç’anda
Ç’ume var handğa.
Skidala
Ar mcveşi nca steri
Dodgineri
Ok’ooneri skidala
Moro oropa çkuni
Moro çkuni oropa.
NURDOĞAN ABAŞİŞİ
23 Guma 2000
-----------------------------------------------------------------------------------
Ar yazi rt’u, qonas na vogni yamo,
Mevanç’i noderis do tamo-tamo,
Bozopek noderis ibirt’es yamo,
Ek’o mskva mot t’u hem ndğas he yamo?!
Rak’anik ran3’k’alaps yamoş sersiten,
Tempo dokaçapt’es mtelik bergiten,
Kimi sari yazma kimi xaseten,
Nodginan qonas do ibiran yamo.
Qonas ar qucişe voxosart’i ma,
Mteliti mot t’es p’ia ek’o mskva
Mtelis uğut’u txozeri toma,
Vusimin ibirt’u yamo he yamo.
Ç’umanden limcişa ek komevakti,
Var oxovo3’oni mek’ilu vakti,
Qali kagelaktu yaziş mjorakti,
Emuşk’ule çkva var vogni yamo.
XASAN HELİMİŞİ
Xopa, 1926
-------------------------------------------------------------------------------
Sİ VAR ORİ
Hiççi golalvapu var uşkun serepeşkimi
Gomindunu nciri vabziram mupa
Naku çere pkoresxi kogişkuni
Oçodu navar uşkun murunsxepe
Si var ori yastuği kva domayen
Ne domaxunen ne domanciren
Anderi nadoskudu sigarati mevaşkvi
A kogişkuttuko guri muço maçven
SİCALEPEŞİ DESTANI
Yoyi nana h’olo komoh’tu yazi
Noderepe ivasen bazi bazi
Kimik yazma kimik moytvasen k’azi
Pukuraşen duzluği dadiçkimi.
Kimi tenbeliren , beliz gyaçaben
Ondğeneyi gyayişe muço daçaben
K’inoni h’ez bureği kogaçaben
P’anda sarma diveni dadiçkimi
Laziztaniz var giğunan çkar nosi
Sica k’oçi oh’oyi gamakosu
Var gaçaşi goykta gekçasen kusi
Eloğliyen giçkitaz dadiçkimi.
Çkar oh’oyiz var geloçanz do k’uzi
Sica deyi ko noh’edunan p’urzi
Var ikith’en pah’ali do ucuzi
Veresiye kort’aşi dadiçkimi.
Esnafikti arişi jur noçaramz
Sermayezti faizi eluçaramz
Badiskaniz k’artali konuç’aramz
Borci giğun deyine dadiç’kimi.
Badiskanik kartali ikith’aşi
Ar c’irati jur p’iciz h’e montğaşi
Kata h’aftaz bureği kogoyğaşi
Elbet borci iç’aren dadiçkimi.
Badi elah’edaz kerençi h’oraz
Sica t’uça bureğ’iz kamuh’edaz
Noğ’amisa ar ğ’ormaz konoh’edaz
İh’osaraz k’ayi giç’onz dadiçkimi.
Sicaşeni damtiyez mu naç’aren
Konuçkinaz noğamisa ren mtini
Şa uçkini gyunaği na naçaren
Ğuraşkule cirasen dadiçkimi.
Sum c’anaren tipiz mundi busume
Gamablaşi kaburgaz h’e bisume
Ne k’aymakliz ne luz elebusume
Şuri stikan çayiten dadiçkimi.
Haşopeten moboga do sicaz çi
Megomskunan mşkeyişi biga eçi
Var yançuyi hemuz boz ona meçi
Sadrazami şarttuyi dadiçkimi.
Gondgineyi sicalepeşi kobra
Nuk’idare h’açi do ckayişi corba
Şar inciran k’ayi ducği do kobra
Dunyaz mutu var unonan dadiçkimi.
Duşuncete kemic’kindu eseri
Karfiz var gemaçen güli keseri
Badiçkimik mu ck’omu ya hamseri
Şa zop’onsi ey gidi dadiçkimi.
Na muzdasen mjati hemuz unt’alamz
Bere bari gemzuli kodutalamz
Muşe kalsa oncğore var gyutalamz
Sicamuşiz goladven dadiçkimi.
Nuri Duduşi (1885-1918)
SİFTERİ
Nulun noğa ngola nulun
3'anaşe xolo moxtasen
Şui men3ouşe mulun ,
P'eya mis nk'eya güktasen
Ti p'anda jin na okaçun
Ç'angiz k'inçi elokaçun
Ğaço ,mzesku ok'ukaçun
Ko nomskun muntxa vasen
Sopes gülun , sole mulun
Tepes yulun , galis gülun
K'inçi şeni nosis ulun
Ena tuyleği ivasen
Handğa mu ağodu haşo
Varmendo3'kes mupey ğaco
Muç'o mebustera muç'o
Hag var mulun , so idasen
En gunz'e sk'ani destani
Dopxarzirit tok'i , xvani
Komegidvit skence sk'ani
Hetepe iy sk'ani t'asen
M . RECAİ ÖZGÜN
AT'MACAŞ ORA
Ağust`ozi mulun at`macaş ora
Va mp`oromi kale bozo gyozgyora
Va mp`orom na dot`kvi , başka gobgora
Muç`o p`a do so bida , e verane
Avli skaniz golobit`işi ğoma
Yaliz o3`k`ert`i do in3xont`i ntoma
Na idare yeriz mot ext`as k`oma
Muç`o p`a do so bida , e verane
Si mot dolexet`i ont`uleş rubas
Mebareri mu dologiz`in ubas
Gondumnare dolobtxare t`obas
Muç`o p`a do so bida , e verane
Dido ç`ut`a giğun si gyuli yaşi
Si mundes mavare , ark`adaşi
Jur toliz domaven , ma iyya yaşi
Muç`o p`a do so bida , e verane
Ar destani p`ç`ari , mteli Lazuri
Ma mutu var mat`k`ven omaç`u guri
Trangi çkimi kemiç`opi ha guri
Muç`o p`a do so bida , e verane
Yaşar Turna ( Arkaburi )
MAÇAYE GZAMŞİNE
Çayi çayi yado şuyi konoç'k'vidi
Goğerdinez mteli ç'urump'i doç'k'idi
Nanimç'ipanasen k'ala meç'k'idi
P'anda haşşo m3k'upi vart'asen gzamşine
Çayi3'ili xepez floxti egolu
Kogasvi do ar k'aoba varmegolu
Gomfalepeşi k'op'ape ok'olu
Muçituni naimt'asen gzamşine
3'anape çkini xirxirite golulun
Çku mabogamt geç'arerepe so ulun
Ç'ut'a ç'uta koyoli ğnosişa mulun
Digurasen do yat'asen gzamşine
Gonoşine ivasen handğalepe
Moylasen cumalepe do dalepe
Gomfalepeşi tiz gextaşi kvalepe
Mjora çkini gonçxant'asen gzamşine
Ark'aburi Fexri Mtenebiva
ARHAVİ DESTANI
Ağustozi mulun atmacaş ora
Kale bozo vamp`oromi göz göra
Vamp`orona mi3`vi başka gobgora
Haşo gabğa giçkit`as gâur bozo
Coxo çkimis başı "N" te niç`aren
Haşo şei k`oçis muç`o naç`aren
Gek mirağums kale mik varnaç`aren
Haşo gabğa giçkit`as gâur bozo
Coxo çkimi iris kuçkin "Naci"ren
Ne sei do ne ndğalei manciren
Bazi bazi izmoceti maz`iren
Haşo gabğa giçkit`as gâur bozo
Si minoe soşen moxti noğaşen
Ğoma muvi ha3` mu ikom mu va en
Cuma soren goyk`itxomi da soren
İr gomdunit gamicoxit noğaşen
Bidat biz`iat ğurepeşi mezayi
Zengin bore fakir bore mu kâri
Çku biz`iat ar k`iyas kogeloğayi
K`ayiten biz`iat heyaren kâri
Mja miğunan maya biğat mebuvat
Yarma koren gayeyiyez gebuat
Didi k`anyas malenate gebuğat
Ar ebza gelapçat p`ot`e mobuğat
ALİ NACİ KUÇUĞİŞİ
Kaynak: SİMA DERGİSİ
